Бишкек, Кыргызстан – 2023-жылдын 14-сентябры  – Бишкекте БУУнун Өнүктүрүү программасынын колдоосу менен Кыргызстандын токойлорун туруктуу башкаруу жана Жаратылышты коргоо баалуулугу жогору токойлордун концепциясын киргизүү боюнча улуттук семинар болуп өттү. Анда Кыргызстанда экологиялык жактан таза жана экономикалык жактан пайдалуу токой чарбасын түзүүнүн жетишкендиктери жана келечеги тууралуу талкуу болду.

Семинарга Кыргыз Республикасынын Жогорку Кеңешинин депутаттары, Кыргыз Республикасынын Жаратылыш ресурстары, экология жана техникалык көзөмөл министрлигинин, Кыргыз Республикасынын Айыл чарба министрлигинин, Кыргыз Республикасынын Улуттук илимдер академиясынын, экологиялык уюмдардын, токой чарба ишканаларынын жана өзгөчө корголуучу жаратылыш аймактарынын өкүлдөрү катышты. Семинардын катышуучулары Кыргызстанда токойду башкаруунун туруктуу практикасын, ыктыярдуу сертификацилоонуну мүмкүнчүлүктөрүн жана Баалуулугу жогору токойлордун концепциясын андан ары ишке ашырууну талкуулашты.

Катышуучулар Кыргызстанда Баалуулугу жогору токойлордун ыкмасын ишке ашыруунун өзгөчөлүктөрү, токойду туруктуу башкаруунун артыкчылыктары жана Батыш Тянь-Шандын максаттуу токой чарба ишканаларында пилоттук колдонуунун артыкчылыктары менен таанышты. Эксперттер ыктыярдуу токойлорун туруктуу башкаруу сертификациясын киргизүү боюнча эл аралык тажрыйба менен бөлүшүп, Токтогул токой чарбасында Баалуулугу жогору токойлордун концепциясынын ишке ашыруусунун пилоттук иштери кандай жүрүп жатканын айтып беришти. Токойду жоопкерчиликтүү башкаруунун инструменттеринин бири катары токойлорду туруктуу башкаруунун ыктыярдуу сертификациясынын Улуттук стандарттарынын иштелип чыккан долбоору өзгөчө кызыгууну жаратты.

Иш-чара Кыргыз Республикасынын токой чарба кызматкерлеринин күнүн белгилөөгө арналды. Семинардын коноктору токой кызматкерлерин кесиптик майрамы менен куттуктап, өлкөнүн жашыл байлыктарын сактоо жана көбөйтүү боюнча мындай жооптуу аракеттер үчүн ыраазычылык билдиришти.