Çıxış üçün hazırlanıb

28 İYUN 2019, 18:00
BAKI, AZƏRBAYCAN
YARAT, XX-XXI ƏSRLƏR AZƏRBAYCAN RƏNGKARLIĞI MUZEYİ

Hər kəsi salamlayıram və Azərbaycanın ilk İnklüzivlik Hakatonunda iştirak edən komandaları təbrik edirəm. Bu gün 48 saatlıq intensiv Hakatonun açılışında inklüzivliyə dəyər verən bu qədər şəxsi burada görməkdən məmnunluq duyuram. Bu Hakatonda siz əlilliyi olan şəxslərin daha asan, daha yaxşı və daha xoşbəxt həyat yaşaması üçün yeni texnoloji həlləri tapmaqla məşğul olacaqsınız.

Hakatonun yaratdığı maraq heyrətamizdir: cəmi bir neçə gün ərzində biz hakatonda maraqlı olan 70 komandadan ərizə qəbul etdik və hər biri 4-5 nəfəri təmsil edən 16 komanda seçildi. Bu otaqda biz Azərbaycanın ən yaxşı texnoloji mütəxəssislərindən bəzilərini, sosial sahibkarları, inklüzivlik üzrə ekspertləri, müxtəlif qabiliyyətlərə malik şəxsləri, habelə ictimai fəalları  - 30-dan artıq şəxsi mentor kimi cəlb edə bildik. Bizim beynəlxalq səviyyədə təqdir olunan və yüksək profilli yerli münsiflər heyətimiz mövcuddur, onların hər biri texnologiyalar üzrə görkəmli analitiklərdir. "Yarat" muzeyindəki bu gözəl məkanın komandaları birgə məhsullar yaratmağa və sosial çətinliklərlə mübarizə aparmağa ruhlandıran real texnoloji mühitə çevrildiyini görməkdən məmnunluq duyuram.

Bu tədbir həm də bu yaxınlarda yaradılmış Akselerator Laboratoriyasının çərçivəsində BMTİP-in keçirdiyi ilk rəsmi tədbirdir. Cari ilin əvvəlki aylarında BMTİP yoxsulluğun azaldılmasından tutmuş keyfiyyətli təhsilə, inklüzivliyə, sərfəli səhiyyə xidmətlərindən istifadəyə, iqlim dəyişmələrinə qarşı mübarizəyə və yaşadığımız planetin müdafiəsinə qədər ən qaynar qlobal məsələlərlə iş tərzimizi dəyişmək üçün dünyanın müxtəlif yerlərində yerləşən 60 akselerator laboratoriyasından ibarət innovativ şəbəkə yaradıb.

Bu gün həm də Azərbaycanın ilk Milli İnklüzivlik Kampaniyası - "UNLİMİTED" çərçivəsində qarşıdakı aylarda və həftələrdə təşkil edəcəyimiz tədbirlər silsiləsinin başlanğıcıdır. Bu kampaniyanın “QOŞUL! RUHLANDIR! CƏLB ET!” şüarı bizim hamımızı ən önəmli məsələ - heç kəsi kənarda qoymadan hər kəsin inkişafdan faydalanmasını təmin etmək kimi ən vacib ortaq məqsəd naminə bir araya gətirir.

İnklüzivliyin qətiyyətli dəstəkçisi və təşviqatçısı, Heydər Əliyev Fondunun vitse-prezidenti Leyla Əliyevanı ürəkdən salamlayıram. Burada hamımızın adından, bu gün bizə qoşulduğunuza və İnklüzivlik Kampaniyasını dəstəklədiyinizə görə səmimi qəlbdən təşəkkür edirəm!

İcazənizlə, bir daha Hakatona qoşulduğunuza və müxtəlif qabiliyyətlərə malik insanların birlikdə işlədiyi, təhsil aldığı və yaratdığı, ƏLİLLİYİ deyil, QABİLİYYƏTİ ön plana çıxaran daha inklüziv bir cəmiyyətin formalaşdırılmasına imkan verəcək vasitələri əldə etmək üçün texnologiyaların inkişaf etdirilməsində Azərbaycana köməklik göstərdiyinizə minnətdarlığımı bildirirəm.

İndi isə xanım Əliyevanı Azərbaycanın 1-ci İnklüziv Hakatonu üçün əks sayımı başlatmağa dəvət edirəm. Leyla xanım, söz Sizindir!