გაეროს განვითარების პროგრამა (UNDP) აქტიურად მუშაობს ადგილობრივ მოსახლეობასთან საქართველოს სხვადასხვა რეგიონში და მხარს უჭერს გარემოსდაცვითი და კლიმატური გამოწვევების დაძლევას ადგილობრივი დონეზე. ეს მრავალმხრივი საქმიანობა ეფუძნება მტკიცე თანამშრომლობასა და ერთიანი ხედვის  შემუშავებას საჯარო უწყებებს, ადგილობრივ მუნიციპალიტეტებს, სამოქალაქო საზოგადოებასა და კერძო სექტორს შორის. 

UNDP-ისა და გლობალური გარემოსდაცვითი ფონდის მცირე გრანტების პროგრამის (GEF SGP) მრავალწლიანი პარტნიორობის შედეგად, ადგილობრივი გარემოსდაცვითი ინიციატივები სხვადასხვა მნიშვნელოვანი მიმართულებით ხორციელდება, რომელთა შორისაა ბიომრავალფეროვნების და საფრთხის წინაშე მყოფი ეკოსისტემების კონსერვაცია, განახლებადი და ენერგოეფექტური ტექნოლოგიების პოპულარიზაცია და კლიმატგონივრული მეწარმეობის ხელშეწყობა. გარემოსდაცვითი სარგებელის გარდა, ასეთ პროექტებს წვლილი შეაქვთ სიღარიბის შემცირებაში, დასაქმების ზრდაში და გენდერული თანასწორობის მიღწევაში.

2012 წლიდან, გლობალური გარემოსდაცვითი ფონდის მცირე გრანტების პროგრამის (GEF SGP) ფარგლებში, 90-ზე მეტი ადგილობრივი ინიციატივა განხორციელდა, ხოლო პროექტის საერთო ღირებულებამ 2 მილიონ აშშ დოლარს გადააჭარბა. 

პროგრამის მიმდინარე ფაზა 2019-2024 წლებს მოიცავს და საქართველოს სემიარიდულ რეგიონებს, დიდი და მცირე კავკასიონის მაღალი მთის ზონასა და შავი ზღვის სანაპიროს ფარავს. სულ, ამ ფაზის ფარგლებში, 750,000 აშშ დოლარის ღირებულების ადგილობრივი პროექტები დაფინანსდა.

ენერგოეფექტური ტექნოლოგიები დუშეთის მუნიციპალიტეტში

ერთ-ერთი ასეთი პროექტი დუშეთის მუნიციპალიტეტში მიმდინარეობს, სადაც UNDP და GEF SGP, საქართველოს ბიომასის ასოციაციასთან, დუშეთის მუნიციპალიტეტთან და სოფლის განვითარების სააგენტოსთან თანამშრომლობით, ხელს უწყობენ ენერგოეფექტური ტექნოლოგიების დანერგვას. პროექტის ფარგლებში, ეკონომიკურად და სოციალურად დაუცველ ოჯახებსა და მაღალმთიანი სოფლების მაცხოვრებლებს ადგილობრივი წარმოების მყარი ბიომასის ენერგოეფექტური ღუმელები გადაეცემა. სულ, პროექტის შედეგებით 40 ოჯახი ისარგებლებს.

გარდა ამისა, პროექტის ფარგლებში საგანმანათლებლო და საინფორმაციო კამპანიაც ხორცილდება. „ენერგოავტობუსი“, რომელიც სპეციალურად ამ მიზნით შეიქმნა, სხვადასხვა მუნიციპალიტეტის 50-მდე თემს ესტუმრება და მოსახლეობას მდგრადი ენერგო მოხმარების პრაქტიკასა და განახლებადი ენერგო რესურსების გამოყენების შესაძლებლობებს გააცნობს. 

ეს საგანმანათლებლო საქმიანობა, საქართველოს სხვა რეგიონებზეც გავრცელდება, მათ შორის, აჭარის ავტონომიური რესპუბლიკაზე და რაჭა-ლეჩხუმის, სამეგრელოს, სამცხე-ჯავახეთის, მესხეთის, მთიანეთისა და ზემო სვანეთის რეგიონებზე.

29 თებერვალს, სოფელ ჩანადირთკარს საქართველოს მთავრობის, ადგილობრივი ხელისუფლებისა და გაეროს განვითარების პროგრამის წარმომადგენლები ეწვივნენ და პროექტის შედეგებს ადგილზე გაეცნენ. 

დელეგაციის შემადგენლობაში შედიოდნენ ოთარ შამუგია, საქართველოს გარემოს დაცვისა და სოფლის მეურნეობის მინისტრი; ანნა ჩერნიშოვა, UNDP-ის მუდმივი წარმომადგენლის მოადგილე საქართველოში; დავით ნოზაძე, სახელმწიფო რწმუნებული მცხეთა-მთიანეთის რეგიონში; და მაცაცო ნარიმანიძე, დუშეთის მუნიციპალიტეტის მერი.