საქართველოს გარემოს დაცვისა და სოფლის მეურნეობის სამინისტროს ეროვნულმა სატყეო სააგენტომ, გაეროს განვითარების პროგრამისა (UNDP) და UNDP-ის ბიომრავალფეროვნების ფინანსირების ინიციატივის (BIOFIN) ხელშეწყობით, შექმნა ონლაინ პლატფორმა „ტყის მეგობარი“, რომლის მეშვეობითაც შესაძლებელია ტყის აღდგენისთვის საჭირო რესურსების მობილიზება და მოქალაქეებისა და ორგანიზაციების ჩართვა გარემოსდაცვით საქმიანობაში.

პლატფორმა „ტყის მეგობარი“ იწვევს კერძო კომპანიებს, ინდივიდუალურ მხარდამჭერებსა და მოხალისეებს საკუთარი წვლილი შეიტანონ გარემოს დაცვის საქმეში და უშუალო მონაწილეობა მიიღონ ახალი ტყის გაშენებაში. პლატფორმაზე წარმოდგენილ აქტივობებში მონაწილეობა შესაძლებელია როგორც ფულადი შემოწირულობით, ისე შრომისა და დროის შეთავაზებით. დარეგისტრირებული მონაწილეები ონლაინ რეჟიმში მიადევნებენ თვალს მათ მიერ არჩეული პროექტების მსვლელობას, საგანმანათლებლო ღონისძიებებში ჩაერთვებიან, საინტერესო და სასარგებლო ინფორმაციას მიიღებენ და სხვა გარემოსდამცველებსაც გაიცნობენ.   

„შევხდებით შენს გაშენებულ ტყეში!“ მოგვიწოდებენ პლატფორმის შემქმნელები და ამით ხაზს უსვამენ გარემოს დაცვაში საზოგადოებრივი ჩართულობისა და კოლექტიური ქმედების გადამწყვეტ მნიშვნელობას.

ონლაინ პლატფორმა „ტყის მეგობარი“ 22 მაისს, ბიომრავალფეროვნების დაცვის დღეს, ამოქმედდა, ხოლო მისი ოფიციალური წარდგენა 1 ივნისს, თბილისის ბოტანიკურ ბაღში გამართულ ღონისძიებაზე შედგა.

ონლაინ პლატფორმა წარადგინეს ოთარ შამუგიამ, საქართველოს გარემოს დაცვისა და სოფლის მეურნეობის მინისტრმა; კახა ცერცვაძემ, ეროვნული სატყეო სააგენტოს უფროსმა; და ნიკ ბერესფორდმა, გაეროს განვითარების პროგრამის (UNDP) მუდმივმა წარმომადგენელმა საქართველოში.