Біріккен Ұлттар Ұйымы Даму бағдарламасының (БҰҰДБ) Қазақстандағы Тұрақты өкілі Катаржина Вавьерниа Еңбек және халықты әлеуметтік қорғау министрі Светлана Жакуповамен кездесіп, ынтымақтастықты кеңейтудің ықтимал бағыттарын талқылады.

Кездесу барысында Вавьерниа министрлікке соңғы жылдары ауқымы айтарлықтай кеңейген, әрі қарай серіктестіктің көкжиектерін айқындаған ұзақ және жемісті ынтымақтастық үшін алғыс білдірді.

Ынтымақтастық кезеңінде БҰҰДБ Министрлікке тарифтік саясатты жетілдіруде қолдау көрсетті, бес аймақта әлеуметтік қызмет көрсетудің интеграциялық орталықтарын құруға бастамашы болды, Астанадағы мүгедектігі бар адамдарды жұмысқа орналастыру бойынша кәсіптік оңалту орталығының пилоттық жобасын іске қосты, мүгедектігі бар адамдар мәселелері жөніндегі кеңесші институтын дамытуға үлес қосты. Биыл 2021 жылдан 2023 жылға дейін созылған «Халықтың әлеуметтік осал топтары үшін әлеуметтік қорғау және белсендіру бағдарламаларының тиімділігі мен қолжетімділігін арттыру» деп аталатын министрлік пен БҰҰ Даму бағдарламасының бірлескен жобасы аяқталып келеді.

Кездесуде тараптар «Отбасының цифрлық картасы» жобасының болашағын да талқылады. БҰҰДБ-ның аймақтардағы қызметі және зорлық-зомбылық экстремизмнің алдын алу бойынша күш-жігер туралы айта келе, Катаржина Вавьерниа жастармен жұмыс жасаудың маңыздылығын атап өтті. Ол үш негізгі бағытқа назар аударды: жастардың әлеуетін дамыту, жұмысқа орналасуға көмектесу және қызметтердің қолжетімділігін қамтамасыз ету. Сондай-ақ, жастарға жұмыс табуға көмектесу жолдарын жақсырақ түсіну үшін зерттеулер жүргізу ұсынылды. Басты мақсат – тәуекел тобындағы жастарға оқшаулаудың жағымсыз салдарының әсерін болдырмау.

Тұтастай алғанда, БҰҰДБ мен Еңбек және халықты әлеуметтік қорғау министрлігі осы кездесуде инклюзивтілікке, инновацияларға және ынтымақтастыққа баса назар аудара отырып, Қазақстандағы әлеуметтік қорғау жүйесін дамытуға өздерінің ортақ ұстанымдарын қуаттады.