Бишкек – 3-июнь, 2022-жыл – Кыргыз Республикасынын Өзгөчө кырдаалдар министрлиги БУУнун Өнүктүрүү программасынын жана Бүткүл дүйнөлүк азык-түлүк программасынын Кыргызстандагы өкүлчүлүгүнүн колдоосу менен кырсыктардан комплекстүү коргоо Концепциясын (2030-жылга чейин кырсыктардын тобокелдигин азайтуунун Улуттук стратегиясы) ишке ашыруунун жүрүшүн талкуулоо боюнча ведомстволор аралык жумушчу топтун кеңейтилген отурумун уюштурду. Жумушчу топтун отурумунун максаты 2018-2022-жылдары Концепциянын аткарылышынын жыйынтыктарын талкуулоо жана талдоо жана 2023-2026-жылдарга өзгөчө кырдаалдардан коопсуздукту камсыздоо боюнча артыкчылыктуу милдеттерди жана иш-чараларды иштеп чыгуу болду.

2030-жылга чейин өзгөчө кырдаалдардан комплекстүү коргоо Концепциясы (кырсыктардын тобокелдигин азайтуунун Улуттук стратегиясы) кырсыктардан коргоону камсыз кылуу жана туруктуу өнүгүү үчүн шарттарды түзүү үчүн Жарандык коргонуунун мамлекеттик тутумун (кырсык коркунучун башкаруунун улуттук системасы) өнүктүрүүнүн негизги артыкчылыктуу багыттарын аныктайт. Кырсыктардын тобокелдигин азайтуунун Улуттук стратегиясынын экинчи фазасы үчүн (2023-2026-жж.) натыйжалуу ишке ашыруу планын иштеп чыгуунун маанилүүлүгүн потенциалдуу саясатты иштеп чыгуу жагынан да, ошондой эле мамлекеттик максаттарды ишке ашырууга кырсык тобокелдигин азайтууну интеграциялоо жагынан да мааниси талашсыз.

Кыргыз Республикасынын Өзгөчө кырдаалдар министринин биринчи орун басары Азамат Мамбетов: «Биз өзгөчө кырдаалдардын жана потенциалдуу кооптуу аймактардын корк тобокелдигин унучун азайтуу боюнча иш алып барууга жоопкерчиликтүү мамиле кылышыбыз керек. Бул жерде бардык тараптар биргелешип иштеши керек», – деп баса белгиледи.

Луиз Чемберлен, Кыргыз Республикасындагы БУУӨПтүн Туруктуу Өкүлү мындай деп белгиледи: «Кырсыктардын тобокелдигин азайтуу боюнча стратегиянын кезектеги иш-аракеттер планы жакырчылыкты кыскартуу, климаттын өзгөрүшүнө каршы күрөшүү, коомдук саламаттыкты сактоо, тамак-аш жана тамактануу, ошондой эле шаарды туруктуу өнүктүрүү аркылуу Кыргызстанга улуттук туруктуу өнүгүү максатына жетүүгө жардам берет».

2023-2026-жылдарга кырсыктардын тобокелдигин азайтуунун Улуттук стратегиясын ишке ашыруу боюнча иш-чаралар планынын долбоору ведомстволор аралык жумушчу топ, эл аралык уюмдар жана илимий мекемелер менен андан ары талкууланат. БУУ бул процессте Өзгөчө кырдаалдар министрлигине колдоо көрсөтүүнү улантат. Акыркы иш-аракеттер планы (2023-2026) расмий түрдө өкмөттүн кароосуна жана бекитүүсүнө 2022-жылдын августуна чейин берилет.

Маалымат үчүн:

2023-2026-жылдарга кырсыктардын тобокелдигин азайтуунун Улуттук стратегиясын ишке ашыруу боюнча иш-чаралар планын иштеп чыгуу Кыргызстандагы БУУӨП жана Бүткүл дүйнөлүк азык-түлүк программасынын колдоосу менен ишке ашырылууда, анын алкагында Кыргыз Республикасынын Өзгөчө кырдаалдар министрлиги жана Өзгөчө кырдаалдар жана кырсыктардын тобокелин азайтуу борбору биринчи этаптын аткарылышын деталдуу талдоо жана баалоо иштерин жүргүзүштү. 2018-жылдан 2022-жылга чейинки мезгилде (биринчи этап) Концепцияны ишке ашыруу боюнча иш-чаралар планын жана экинчи этапка (2023-2026-жылдарга) иштелип чыккан Планды, бардык кызыкдар тараптар менен макулдашуу зарыл.

2018-2030-жылдарга Кыргыз Республикасынын калкын жана аймагын өзгөчө кырдаалдардан комплекстүү коргоо Концепциясы Кыргыз Республикасынын Өкмөтүнүн 2018-жылдын 29-январындагы № 58 токтому менен бекитилген. Бул Концепциянын негизги максаты өлкөнүн калкынын жана аймактарынын өзгөчө кырдаалдардан жана кырсыктардан коопсуздугун камсыз кылуу үчүн Жарандык коргонуунун мамлекеттик системасын өнүктүрүүнүн узак мөөнөттүү артыкчылыктарын белгилөө.