Janë përzgjedhur 10 komuna të reja, të cilat në 18 muajt e ardhshëm do të jenë pjesë e programit "Fuqizimi i këshillave komunale". Bëhet fjalë për komunat Kisella Vodë, Studeniçan, Gradsko, Karbinci, Vinicë, Dibër, Mavrovë dhe Rostushë, Gjevgjeli, Resnjë dhe Rankovcë, të cilat u përzgjodhën përmes thirrjes publike për të cilën aplikuan gjithsej 28 njësi të vetëqeverisjes lokale.

Programi "Fuqizimi i këshillave komunale" fokusohet në disa komponentë përmes të cilëve përmirësohen kapacitetet e komunave për ofrim transparent, të përgjegjshëm dhe cilësor të shërbimeve lokale për qytetarët. Këshilltarët në komunat e përzgjedhura do të kenë mundësinë të marrin pjesë në Programin për zhvillimin e kapacitetit të këshilltarëve komunal, i cili përfshin trajnime në gjithsej 11 tema që kanë të bëjnë me menaxhimin e financave publike, planifikimin hapësinor dhe urban, qeverisjen e mirë dhe luftën kundër korrupsionit, bashkëpunimi ndërkomunal, barazinë gjinore, mjedisin jetësor dhe përballjen me krizat në nivel lokal.

Gjithashtu, secila nga dhjetë komunat do të ketë mundësinë të shfrytëzojë një grant në vlerë prej 30,000 deri në 50,000 dollarë për projektet që do të përzgjidhen përmes konsultimit të drejtpërdrejtë me qytetarët përmes Forumeve në bashkësi. Këto projekte, në të cilat do të marrin pjesë me bashkëfinancim edhe komunat, kanë për qëllim përmirësimin e cilësisë së jetës në komunitetin lokal.