BMT Taraqqiyot Dasturi (UNDP) soliqlar va Barqaror rivojlanish maqsadlariga oid o‘quv seminari tashkil qildi
19-August, 2024
![a group of people posing for a photo](/sites/g/files/zskgke326/files/2024-08/home.jpg)
2024-yil 14-16-avgust kunlari BMT Taraqqiyot Dasturi O‘zbekiston Iqtisodiyot va Moliya vazirligi, O‘zbekiston Respublikasi Vazirlar Mahkamasi huzuridagi Soliq qo‘mitasi va O‘zbekiston Iqtisodiyot va Moliya vazirligi huzuridagi Fiskal tadqiqotlar instituti bilan birgalikda “Barqaror rivojlanish maqsadlari (BRM) uchun soliqlar” mavzusida o‘quv seminarini tashkil qildilar. O‘quv kursi BMT Taraqqiyot Dasturining “BRM uchun soliqlar” bo‘yicha texnik eksperti, ushbu kursni ishlab chiqqan doktor Leyla Latif tomonidan o‘tkazildi. Qiziqarli ma’ruzalarni o‘z ichiga olgan tadbirda soliq maslahatchilari va amaliyotchilar ham ishtirok etishdi.
Fundamental va ilg‘or modullar asosida ishlab chiqilgan ushbu trening soliq ma’muriyati mutaxassislari, siyosatchilar va akademik tadqiqotchilarning texnik tajribasi hamda salohiyatini oshirishga qaratilgan.
![a group of people sitting at a table](/sites/g/files/zskgke326/files/2024-08/img_001_9.jpg)
Asosiy modulda, barcha ishtirokchilar uchun asos yaratilgan holda, soliqning prinsiplari va ularning BRMga erishishda qanday rol o‘ynashi o‘rganib chiqildi. Unda soliq tizimlari va ijtimoiy shartnomaning asosiy xususiyatlari ko‘rib chiqilib, ularning barqaror rivojlanish bilan o‘zaro bog‘liqligi ko‘rsatildi. Shu bilan birga, soliq boshqaruvi moduli BRMga mos soliq siyosatini amalga oshirishning amaliy jihatlarini qamrab oldi.
Modulda soliq boshqaruvi va daromadlarni mobilizatsiya qilishdagi asosiy muammolarni, bu muammolarni yengish strategiyalarini va noqonuniy moliyaviy oqimlarga qarshi kurashishning muhim masalasi muhokama qilindi. Shuningdek, akademiklar modulida soliq va BRM o‘rtasidagi aloqalarni tushunishda tadqiqot va ta’limning roli alohida ta’kidlandi. Modul, BRMga muvofiq soliqqa tortishni amalga oshirish mumkin bo‘lgan huquqiy va soliq arxitekturasini taqdim etdi va akademik tadqiqotning bu tushunchaga qanday hissa qo‘shishini ko‘rsatdi.
Trening davomida ishtirokchilar QQS va bojxona sohasidagi daromad oqimlari, norasmiy sektorni soliqqa tortish va soliq boshqaruvida raqamli texnologiyalarni qo‘llash kabi mavzularni o‘rgandilar. Shuningdek, Islom moliyaviy tizimi va Islom moliyaviy tranzaksiyalarini soliqqa tortishga alohida e’tibor qaratildi, bu esa O‘zbekistonning ushbu sektorni rivojlantirishga bo‘lgan qiziqishini aks ettiradi.
Ishtirokchilar o‘quv mashg‘ulotlari davomida interfaol sessiyalar, jumladan, viktorinalar, reflektiv mashqlar va muhokamalar bilan band bo‘lishdi. Bu ularga yondashuv tushunchalarni amalda qo‘llash va O‘zbekiston sharoitida barqaror rivojlanishni qo‘llab-quvvatlash uchun soliqqa tortishda qanday foydalanish mumkinligini chuqurroq tushunishga yordam berdi.
BMT Taraqqiyot Dasturining “BRM uchun soliqlar” tashabbusi 2022-yil aprel oyida Finlyandiya va Norvegiya hukumatlari tomonidan birgalikda moliyalash orqali rivojlanayotgan mamlakatlarni ichki resurslarni safarbar qilishga va Barqaror rivojlanish maqsadlariga erishishda qo‘llab-quvvatlash maqsadida tashkil qilingan. U BMT Taraqqiyot Dasturining Barqaror moliya markazining bir qismi bo‘lib, hozirda butun dunyo bo‘ylab 25 ta davlatni qamrab oladi.