Avropa İttifaqı (Aİ) və BMT-nin İnkişaf Proqramı aprel ayında təşkil etdiyi İdeyalaşdırma Təlim Düşərgəsindən seçilmiş sosial sahibkarlar üçün inkubasiya mərhələsinə başlayıb.

İnkubasiya proqramı Aİ tərəfindən maliyyələşdirilən vətəndaş cəmiyyəti təşkilatlarına dəstək layihəsi çərçivəsində həyata keçirilir. İnkubasiya proqramına Ağdam, Bakı, Biləsuvar, Gəncə, Mingəçevir, Neftçala, Şəmkir, Şəki, Sumqayıt və Zaqataladan İdeyalaşdırma Düşərgəsi çərçivəsində ən yaxşı sosial biznes ideyaları ilə çıxış edən 41 iştirakçı vəsiqə qazanıb. Prosesin ilk 3 günlük təlimində biznesin sosial təsirini qiymətləndirmək məqsədi daşıyan “İnvestisiyadan sosial gəlir” adlı metod təqdim edilib və sosial hesabat üçün məlumatların vizuallaşdırılması və kommunikasiyası müzakirə edilib. Seminarlar sosial iqtisadiyyat, yerli və inklüziv inkişaf üzrə ixtisaslaşmış ARCO Araşdırma Mərkəzi (İtaliya) tərəfindən aparılır.

İnkubasiya Proqramı - sosial sahibkarlara öz biznes ideyalarını daha da təkmilləşdirmək və sosial faydalara diqqət yetirməklə bizneslərinin kommersiya aspektini gücləndirmək istiqamətində dəstək məqsədi daşıyır.

2 aylıq inkubasiyanın sonunda sözügedən sahibkarlar öz biznes planlarını yekunlaşdıracaq və 30-a qədər ən yaxşı plana sahib tərəflər sosial yönümlü bizneslərini həyata keçirməyə başlamaq üçün maliyyə dəstəyi əldə edəcəklər. Bu sosial bizneslər məşğulluq, inklüziv və daha münasib xidmətlər, yeni təhsil imkanları, “yaşıl” həllər və innovativ tərəfdaşlıqlar təklif etməklə Dayanıqlı İnkişaf Məqsədlərinə nail olmağa töhfə verəcək.

Seçilmiş sosial sahibkarların adlarını buradan öyrənin.

***

İnkubasiya prosesi, Aİ-nin maliyyələşdirdiyi və BMTİP-nin həyata keçirdiyi “Azərbaycanda innovasiya əsaslı və dayanıqlı vətəndaş cəmiyyətinin inkişafı” layihəsi tərəfindən həyata keçirilir. 
Layihə - siyasətlərin formalaşdırılması, yerli inkişafa dəstək, ölkədə sosial sahibkarlığın təşviqi sahələrində VCT-lərin iştirakının artırılması məqsədilə onların potensialının gücləndirilməsini hədəfləyir.

Əlaqə üçün məlumat:

Leyla Qurbanova, BMTİP-nin Azərbaycan ofisinin Kommunikasiyalar üzrə mütəxəssisi – leyla.gurbanova@undp.org 

Gülnarə Bayramova, Avropa İttifaqının Azərbaycan Nümayəndəliyinin Mətbuat və İnformasiya Rəhbəri gulnara.bayramova@eeas.europa.eu

Avropa İttifaqı öz nou-hausunu, resurslarını və amallarını tədricən birləşdirmək qərarına gəlmiş 27 üzv dövlətdən ibarətdir. 60 ildən artıq genişlənmə müddəti ərzində, onlar, birgə olaraq, mədəni müxtəlifliyi, tolerantlığı və fərdi azadlıqları qoruyub saxlayaraq, sabitlik, demokratiya və dayanıqlı inkişaf zonasını yaradıblar. Avropa İttifaqı öz sərhədlərindən kənarda digər ölkə və xalqlarla öz nailiyyətlərini və dəyərlərini paylaşmağa sadiq olan tərəfdir.

BMT-nin İnkişaf Proqramı BMT-nin aparıcı agentliyi olub, yoxsulluq, bərabərsizlik və iqlim dəyişikliyi ilə mübarizə aparmaqdadır. Biz, 170 ölkədə müxtəlif mütəxəssis və tərəfdaşlarımızdan ibarət geniş şəbəkəmizlə birgə fəaliyyət göstərərək, planet və insanlar üçün hərtərəfli və dayanıqlı həllər üzərində çalışırıq.

Ətraflı məlumat üçün undp.org vebsaytına baş çəkə yaxud Twitter-də @UNDP səhifəsini izləyə bilərsiniz.