ხარისხიან პროფესიულ განათლებას შეუძლია წარმატებისა და კეთილდღეობის გზა გაუხსნას ბევრ ადამიანს, რომელიც საქართველოში კვლავ უმუშევრობასა და სიღარიბეს  ებრძვის. ქართველი ახალგაზრდების 34 პროცენტი არაა ჩართული არც დასაქმებაში, არც განათლებასა თუ ტრენინგში, ხოლო ახალგაზრდებს შორის უმუშევრობა ზოგიერთ რეგიონში 40 პროცენტს აღემატება.

პროფესიული განათლების ეფექტიანობის გაზრდის მიზნით, პროფესიული უნარების სააგენტომ, შვეიცარიის განვითარებისა და თანამშრომლობის სააგენტოსა (SDC) და გაეროს განვითარების პროგრამის (UNDP) ხელშეწყობით, ფართომასშტაბიანი მსჯელობა წამოიწყო.

უნარების კვირეულში, რომელიც 18-22 ივლისს გაიმართა, სამთავრობო უწყებები, საგანმანათლებლო დაწესებულებები და კერძო კომპანიები ჩაერთნენ. კვირეულის ცენტრალურ შინაარსს თანამედროვე პროფესიული სწავლების განვითარება და ამ მხრივ, საჯარო და კერძო სექტორებს შორის თანამშრომლობა წარმოადგენდა.     

კვირეულის მონაწილეებმა იმსჯელეს პროფესიულ სასწავლებლებს, სამთავრობო უწყებებსა და კერძო სექტორს შორის პარტნიორობაზე, რამაც შრომის ბაზარზე საჭირო უნარების განვითარება და შესაბამისად, დასაქმებისა და ეკონომიკის ზრდა უნდა გამოიწვიოს. მსჯელობა ასევე შეეხო პროფესიულ განათლებასთან დაკავშირებულ სხვა საკვანძო საკითხებს, მათ შორის პიროვნული თვითრეალიზაციის შესაძლებლობების შექმნას ნებისმიერი ასაკისა და გამოცდილების მქონე ადამიანისთვის და ინტეგრირებული სასწავლო პროგრამების განხორციელებას პროფესიულ განათლებაში არსებული „ჩიხური“ მოდელების შესაცვლელად.

პროფესიული უნარების სააგენტოს წარმომადგენლებმა წარადგინეს უახლესი კვლევის შედეგები, რომელიც პროფესიული განათლებისა და ტრენინგის მიმართ საზოგადოების დამოკიდებულებას ასახავს. მათ ასევე იმსჯელეს პროფესიული განათლებისა და ტრენინგის სისტემური კვლევის ხედვაზე და „უნარების ეკოსისტემის“ განვითარების პერსპექტივებზე, რომელმაც შრომით ბაზარზე არსებული მოთხოვნა შესაბამისი უნარების მიწოდებასთან უნდა დააბალანსოს.