2020 წელს, საქართველომ სავალდებულო საარჩვენო გენდერული კვოტები შემოიღო, რის შედეგადაც ქალთა პოლიტიკური მონაწილეობა საგრძნობლად გაიზარდა როგორც ეროვნულ, ისე ადგილობრივ დონეზე. 2020 წლის საპარლამენტო და 2021 წლის ადგილობრივი არჩევნების შედეგად, პარლამენტში ქალთა მონაწილეობა 14 პროცენტიდან 20 პროცენტამდე გაიზარდა, ხოლო საკრებულოებში 13.8 პროცენტიდან 24 პროცენტამდე. 

ამ თვალსაჩინო შედეგის მიუხედავად, საქართველოს პარლამენტში ქალები მხოლოდ ერთ მეხუთედს შეადგენენ, ხოლო საკრებულოებში ერთ მეოთხედს, რაც საკმარისი არაა რეალური გავლენის მოსახდენად გადაწყვეტილების მიღებისა და პოლიტიკის შექმნის პროცესზე.

საკრებულოს წევრ ქალთა ყოველწლიური პოლიტიკური ფორუმი დინამიური პლატფორმაა, რომელიც სხვადასხვა პოლიტიკური პარტიის წარმომადგენლებს აერთიანებს და ქალთა პოლიტიკური წარმომადგენლობის გაზრდას ემსახურება. ბოლო ათი წლის მანძილზე, ფორუმის მონაწილეები, მათი პოლიტიკური განსხვავებების მიუხედავად, ერთად მუშაობდნენ ისეთი მნიშვნელოვანი საკითხების გადასაჭრელად, როგორებიცაა მუნიციპალური სერვისების განვითარება, სკოლამდელი განათლების გაუმჯობესება და პროფესიული გადამზადების შესაძლებლობების გაფართოება.

მომავალი საპარლამენტო (2024) და ადგილობრივი თვითმმართველობის (2025) არჩევნებისთვის მზადების პერიოდში, საკრებულოს წევრ ქალთა პოლიტიკური ფორუმი პოლიტიკური აქტორების თანამშრომლობის სივრცეს ქმნის, რის შედეგადაც იზრდება პოლიტიკურ დღის წესრიგში განსხვავებული პერსპექტივებისა და ხედვების ინტეგრირების შესაძლებლობა.

დამატებითი ინფორმაცია: 

შვედეთის მიერ დაფინანსებული გაეროს ერთობლივი პროგრამა გენდერული თანასწორობისთვის ხელს უწყობს საქართველოში გენდერული თანასწორობის მიღწევას როგორც პოლიტიკურ, ისე სოციალურ და ეკონომიკურ დონეზე. პროგრამას ახორციელებს გაეროს სამი სააგენტო - გაეროს განვითარების პროგრამა, გაეროს მოსახლეობის ფონდი და გაეროს ქალთა ორგანიზაცია. 

საკონტაქტო ინფორმაცია ჟურნალისტებისთვის:

• სოფო ჭიჭინაძე, UNDP, +995 599 196907, sophie.tchitchinadze@undp.org
• ელენე საყვარელიძე, UNDP, +995 599 003944, elene.sakvarelidze@undp.org