Yoshlar kuni arafasida Toshkent davlat agrar universitetida Qishloq xo‘jaligi vazirligi tizimidagi 10 ta oliy ta’lim muassasalaridagi talaba yoshlar o‘rtasida “Yoshlar va innovatsion qishloq xo‘jaligi” ko‘rik-tanlovining final bosqichi bo‘lib o‘tdi. Samarqand davlat veterinariya, chorvachilik va biotexnologiya universitetining Nukus filiali yosh ko‘chatlarni ochiq maydonga ekishdan oldin ishlatiladigan yelim plastik idishlar o‘rniga qo‘y junidan tayyorlanadigan biologik idishlarni yaratishga qaratilgan g‘oyasining iqlim va eko tizimga foydasi yuqorililigi bilan mutlaq g‘olib deb topildi va barqaror qishloq xo‘jaligi bo‘yicha Yevropaning ilg‘or tajribasini o‘rganish uchun o‘quv safariga yo‘llanmani qo‘lga kiritdi. Toshkent davlat agrar universiteti uy xo‘jaliklari uchun smart veterinariya shifoxonasi taklifi uchun ikkinchi o‘rin va jamoa a’zolarining har biri uchun noutbuk, Andijon qishloq xo‘jaligi va agrotexnologiyalar instituti ekinlar bo‘yicha maslahat xizmatlarini ko‘rsatuvchi “Space agro” platformasi g‘oyasi uchun uchinchi o‘ringa loyiq deb topilib, jamoa a’zolariga planshetlar taqdim etildi.

Tanlov 3 bosqichdan iborat bo‘lib, dastlabki universitet va institut bosqichlarida 10 ta oliy ta’lim muassasalaridan jami 4099 nafar talaba-yoshlar ishtirok etish xohishini bildirgan bo‘lib, shundan 1851 nafarini xotin-qizlarni tashkil etdi.

Har bir oliy ta’lim muassasasida fakultetlar bo‘yicha jamoalar shakllantirilib, birinchi oliy ta’lim muassalari bosqichi o‘tkazildi. Ushbu tanlovlarda 10 ta oliy ta’lim muassasalarining 44 ta jamoalaridan 264 nafar talaba-yoshlarning (shundan 132 nafar xotin-qizlar) ishtirok etdi, g‘olib jamoalar yakuniy bosqichga yo‘llanma oldilar. 

Yevropa Ittifoqining O‘zbekistondagi elchisi Sharlotta Adriaen xonim O‘zbekistondagi yoshlarni iqlim o‘zgarishi kabi global muammolarni hal qilish bilan bog‘liq mavzularda Yevropada o‘qish yoki tadqiqot olib borish uchun Yevropa Ittifoqi tomonidan moliyalashtiriladigan ERASMUS+  va HORIZON kabi boshqa dasturlarda ishtirok etishga undadi.