27 aprel 2022-ci il – Ailə, Qadın və Uşaq Problemləri üzrə Dövlət Komitəsinin (AQUPDK) sədr müavini Sədaqət Qəhrəmanova, İsveçrənin Azərbaycandakı səfiri Zati-aliləri xanım Muriel Peneveyre, İsveçrə Əməkdaşlıq ofisinin regional direktorunun müavini Alberto Hernandez və BMT-nin İnkişaf Proqramının (BMTİP) rezident nümayəndəsinin müavini Çaru Bista Qusara səfər ediblər. Səfərin əsas məqsədi Qadın Resurs Mərkəzi (QRM) üzvləri ilə görüşmək və son bir neçə il ərzində yerli qadınlar tərəfindən qurulmuş kiçik bizneslərə baş çəkmək olub.

Səfər çərçivəsində qonaqlar Qusar İcra Hakimiyyətinin başçısının müavini Elman Mustafayevlə görüşüblər. Onlar uğurlu əməkdaşlığın nəticələrini və gələcək əməkdaşlıq imkanlarını müzakirə ediblər.

Daha sonra qonaqlar Qadın Resurs Mərkəzinə baş çəkiblər və Mərkəzin aktiv üzvləri ilə görüşüblər. Mərkəzdə həyata keçirilən layihə çərçivəsində təşkil olunan təlimləri uğurla başa vuran qadınlar üçün sertifikat təqdimetmə mərasimi təşkil olunub. Növbəti dayanacaq 20-dən çox layihə iştirakçısının öz əl işlərini və məhsullarını təqdim etdiyi sərgi olub. Səfər Xuray və Çiləgir kəndlərində öz kiçik biznesini açmış yerli qadın sahibkarların fəaliyyətinə baxışla yekunlaşıb.

***

2018-dən bu yana BMTİP İsveçrə İnkişaf və Əməkdaşlıq Agentliyi və Avstriya İnkişaf Agentliyinin maliyyə dəstəyi ilə və AQUPDK ilə əməkdaşlıq çərçivəsində Qusar, Sabirabad və Xəzərdə (Bakı) “Cənubi Qafqazda Qadınların İqtisadi Səlahiyyətlərinin Artırılması” layihəsini həyata keçirir. Nəticədə 2 QRM qurulub və 1 Mərkəzə dəstək göstərilib, eləcə də 115 qadın öz biznesini qurub. 30 biznes isə Qusarda qurulub. 678 qadın məşğulluqlarını və biznes bacarıqlarını artırmaq üçün təlimlərdə iştirak edib. 8 özəl şirkət Qadınların Səlahiyyətləndirilməsi Prinsiplərini qəbul edib və onların icrasını vəd edib.

Layihənin ikinci mərhələsi 2022-ci ilin yanvar ayında başlayıb. Bu mərhələdə layihə çərçivəsində fəaliyyət göstərən QRM-lərə dəstək davam edəcək və daha bir Mərkəz münaqişədən zərər çəkmiş Füzuli rayonunda açılacaq. 4 rayonda 130 qadına biznes qurmaqda dəstək veriləcək və 350 qadın məşğulluq imkanlarından yararlanacaq. Layihə özəl sektorla da əməkdaşlığı hədəfləyir.