ადამიანის ჯანმრთელობის დასაცავად დაწყებული თანამშრომლობა პანდემიის ყველაზე მწვავე პერიოდის დასრულების შემდეგაც გაგრძელდა. ვაქცინაციის კამპანიის შემდეგ ეტაპზე, განსაკუთრებული ყურადღება ექცეოდა ინფორმაციის გავრცელებას ზოგადი იმუნიზაციისა და მათ შორის, პაპილომა ვირუსის საწინააღმდეგო ვაქცინაციის შესახებ.

დაავადებათა კონტროლისა და საზოგადოებრივი ჯანმრთელობის ეროვნული ცენტრის მონაცემებით, საშვილოსნოს ყელის კიბო, რომლის გამომწვევი მიზეზი ხშირ შემთხვევაში სწორედ პაპილომა ვირუსია, საქართველოში გავრცელებული ავთვისებიანი დაავადებების ხუთეულში შედის. 2021 წელს, 281 ახალი შემთხვევა დაფიქსირდა, აქედან 151 ადამიანი გარდაიცვალა.

პაპილომა ვირუსის საწინააღმდეგო ვაქცინირება გათვალისწინებულია ვაქცინაციის ეროვნული პროგრამით, რაც სამიზნე ჯგუფებში უფასო აცრასა და ვაქცინებზე თავისუფალ წვდომას გულისხმობს. ამის მიუხედავად, 2021 წელს, ვაქცინაციის მაჩვენებელი სამიზნე ჯგუფში (10-12 წლის გოგოები) 24 პროცენტს არ აღემატებოდა. 2023 წელს, ვითარება ოდნავ გაუმჯობესდა, რადგან ვაქცინაციის ეროვნული პროგრამა 10-დან 45 წლამდე ქალებზე და 10-12 წლის ბიჭებზეც გავრცელდა. თუმცა, ვაქცინაციის გაზრდილი მაჩვენებლები კვლავ არასაკმარისი იყო პაპილომა ვირუსის  გავრცელების შესამცირებლად.

იმუნიზაციის პროცესის წარმატებისთვის აუცილებელი იყო სწორი და სანდო ინფორმაციის გავრცელება, მოქალაქეთა ინფორმირება და სამედიცინო პერსონალის გადამზადება. სწორედ ეს მიზნები დაისახა დაავადებათა კონტროლისა და საზოგადოებრივი ჯანმრთელობის ეროვნული ცენტრის ახალმა ინიციატივამ, რომელიც გაეროს განვითარების პროგრამისა და შვედეთის მხარდაჭერით განხორციელდა.

იმუნიზაციის კამპანიამ, რომელიც 2022 წლის ოქტომბრიდან 2023 წლის აპრილამდე მიმდინარეობდა, ქვემო ქართლისა და სამცხე-ჯავახეთის რეგიონების 13 მუნიციპალიტეტი მოიცვა. ადგილობრივი მაცხოვრებლები, მათ შორის, ეთნიკური უმცირესობებისა და არასამთავრობო ორგანიზაციების წარმომადგენლები, აქტიურად იყვნენ ჩართული კამპანიის განხორციელებაში. ასევე მაღალი იყო ექიმებისა და სამედიცინო პერსონალის ჩართულობა, რომელთათვისაც ეს კამპანია დამატებითი ინფორმაციის მიღების, კვალიფიკაციის ამაღლებისა და პროფესიული თავდაჯერებულობის გაზრდის საშუალება აღმოჩნდა.

ჯანდაცვის 820-მა მუშაკმა გაირა ტრენინგი იმუნიზაციასა და ვაქცინაციასთან დაკავშირებულ სხვადასხვა საკითხში, მათ შორის პაციენტებთან ეფექტიან კომუნიკაციაში. ბევრმა ექთანმა ასეთ ტრენინგში პირველად მიიღო მონაწილეობა. ტრენინგისა და საინფორმაციო შეხვედრების მონაწილეები ღიად მსჯელობდნენ ვაქცინაციასთან დაკავშირებულ გამოწვევებზე, სვამდნენ შეკითხვებს, არკვევდნენ მათთვის საინტერესო ინფორმაციას და დაუფარავად გამოხატავდნენ თავის წუხილსა თუ ეჭვებს. ეთნიკური უმცირესობების წარმომადგენლთათვის ტრენინგი თარჯიმნების დახმარებით ტარდებოდა, რამაც იმთავითვე მოხსნა ენობრივი ბარიერები და აამაღლა მონაწილეთა ნდობა სასწავლო პროგრამის მიმართ.

ნინო ზედგინიძე, დაავადებათა კონტროლისა და საზოგადოებრივი ჯანმრთელობის ეროვნული ცენტრის სამცხე-ჯავახეთის განყოფილების უფროსი, ამბობს, რომ ვაქცინაციის კამპანია გასცდა სამედიცინო დაწესებულებებს და ადგილობრივ თვითმმართველობასა და სახელმწიფო უწყებებზეც გავრცელდა. 

„ადგილობრივი ხელისუფლების წარმომადგენელთათვის ჩატარებულმა სემინარებმა არა მხოლოდ გაზარდა მათი ინფორმირებულობა ინფექციების კონტროლის, რისკების კომუნიკაციისა და მოსახლეობის მობილიზაციის სტრატეგიების შესახებ, არამედ ასევე აამაღლა მონაწილეთა ნდობა და შექმნა მოტივაცია, დაგეგმონ საკომუნიკაციო ინტერვენციები ჯანმრთელობის გამოწვევების გადასაჭრელად და პრევენციული ღონისძიებების გასაუმჯობესებლად. ჩვენი კამპანიის შედეგად, შიდა ქართლისა და სამცხე ჯავახეთის რეგიონებში სულ 723 ბენეფიციარი აიცრა.“

მსოფლიოში, რომელიც მუდმივად ებრძვის ჯანმრთელობასთან დაკავშირებულ გამოწვევებს, ცოდნა, განათლება და ჩართულობა ქმნის საფუძველს რეალური ცვლილებისთვის. საზოგადოება, რომელსაც ინფორმირებული ჯანდაცვის მუშაკები და განათლებული მოსახლეობა ჰყავს, უკეთ იცავს თავს ისეთი საფრთხეებისგან, როგორიცაა კოვიდ პანდემია და პაპილომა ვირუსი.