ეკონომიკური გენდერული უთანასწორობა საქართველოსთვის კვლავ გამოწვევაა, რაც ბიზნეს აქტივობებში ქალთა არასაკმარისი მონაწილეობით გამოიხატება. ბოლო წლებში გამოქვეყნებული კვლევების მიხედვით, ქალები ეკონომიკურად აქტიური საწარმოების მხოლოდ მესამედს ფლობენ, ხოლო კერძო კომპანიების მმართველობაში 16.5 პროცენტით არიან წარმოდგენილნი (UN Women/ILO, 2023). ახლადშექმნილი ბიზნესების მხოლოდ 25 პროცენტი ეკუთვნის ქალებს, ხოლო ქალთა ჩართულობა ფორმალურ დასაქმებაში 33.9 პროცენტს არ აღემატება (საქსტატი. 2023).

ამ გამოწვევების საპასუხოდ, გაეროს განვითარების პროგრამა (UNDP) და საქართველოს ბანკი, შვედეთის ხელშეწყობით, აქტიურად უჭერენ მხარს მეწარმე ქალებს და ხელს უწყობენ მათ წარმატებას საქართველოს ბიზნეს სივრცეში.

18 ივნისს, თბილისში გამართულ ბიზნეს ფორუმზე, 150-მდე მეწარმე ქალი შეიკრიბა და ერთმანეთს საკუთარი წარმატების ისტორიები და გამოწვევების დაძლევის გამოცდილება გაუზიარა. 

ფორუმზე წარმოდგენილი იყვნენ მეწარმე ქალები საქართველოს 12 რეგიონიდან, რომლებიც აქტიურად ჩართულები არიან UNDP-სა და საქართველოს ბანკის „მეწარმე ქალთა განვითარების პროგრამაში“.

აღნიშნული პროგრამა 2022 წლიდან მოქმედებს და ხელშეწყობის, ტრენინგისა და ქოუჩინგის უნიკალურ მოდელს სთავაზობს მეწარმე ქალებს კონკურენტულ ბიზნეს გარემოში დასამკვიდრებლად. წარმატების ისტორიები, რომლებიც პროგრამის შვიდი ნაკადის მანძილზე დაგროვდა, მეწარმეობის სხვადასხვა სფეროს მოიცავს, მათ შორის ტურიზმისა და სტუმარმასპინძლობის სექტორებს, სასოფლო-სამეურნეო საქმიანობას, განათლებას, ტექნოლოგიებს, ტექსტილის წარმოებას, კვების ინდუსტრიასა და ელექტრონულ კომერციას.

თავის სამოტივაციო გამოსვლებსა და პანელურ დისკუსიებში, პროგრამის მონაწილეებმა და მოწვეულმა სპიკერებმა საკუთარ გამოცდილებაზე ისაუბრეს. მათ განსხვავებულ ისტორიებსა და მრავალფეროვან პირად გამოცდილებას ერთი რამ აერთიანებდა - წარმატების სურვილი, საკუთარი თავის რწმენა და გამოწვევებთან გამკლავების უნარი. 

მოწვეულ სპიკერებსა და პანელური დისკუსიების მონაწილეთა შორის იყვნენ: 

• ნინო ზამბახიძე, საქართველოს ფერმერთა ასოციაცია
• ქეთევან ვაჩიბერიძე, 'Storera' (ყოფილი B2C.GE)
• ნათია ნინიკელაშვილი, soplidan.ge
• ნანა დიხამინჯია, სიფრული გარდაქმნის ცენტრი, ალტე უნივერსიტეტი
• მუსია ქებურია, ‘Musya's Work·Shop’
• ვერიკო ბაზალი, ‘Hippo Velo’
• ნათია კახიძე, Woodhide Hotel
• თათია ხაინდრავა, 'Wowchy'
• ია იმერლიშვილი, „იას მეღვინეობა“
• თეა ედიშერაშვილი, „შოკოჰოლიკი“