Улаанбаатар хот, 12-р сарын 10-ны өдөр- НҮБ-ын Хөгжийн хөтөлбөр Улаанбаатар хотын гэр хороолол дахь айл өрхүүдийн нүүрсний хэрэглээг бууруулж, нарны эрчим хүчний эх үүсвэрт шилжихэд дэмжлэг үзүүлэх зорилгоор “If Only I Could Go Solar” хамтын санхүүжилт босгох аяныг эхлүүллээ. Аяны нээлтийн арга хэмжээнд төр, иргэний нийгмийн байгууллагууд, хувийн хэвшил, хэвлэл мэдээллийн төлөөллүүд оролцож, Улаанбаатар хотын агаарын бохирдлын асуудлыг хэлэлцэж, боломжит шийдлүүдийг дэвшүүлэн, эрүүл, ногоон ирээдүйн төлөө хамтран ажиллахаа илэрхийллээ.

Монгол Улсын нүүрснээс хараат байдал нь Улаанбаатар хотын оршин суугчдын амьжиргаа, эрүүл мэндэд сөргөөр нөлөөлж байна. Монгол Улсад 7,000 хүн жилд гадаад болон дотоод орчны агаарын бохирдлын нөлөөгөөр нас барж байгаа бөгөөд энэ нь Монгол Улсын ДНБ-ний 10 хувьтай тэнцэх хэмжээний эдийн засгийн хохирол учруулж байна. Түүнчлэн, -45 хэмийг даван туулах зорилгоор гэр хороолол дахь өрхүүд нүүрс түлж өвөлжиж буй нь агаарыг улам бохирдуулж байна. Хэдий нөхцөл байдал ийм боловч, Монгол Улс жилийн 250 өдөр нартай, цэлмэг байдаг нь нарны эрчим хүчийг ашиглах боломжоор арвин болохыг илтгэж байна.

Хамтын санхүүжилт босгох энэхүү аяны үр дүнд Улаанбаатар хотын гэр хороолол дахь айл өрхүүдэд нарны хавтан, дулаан хуримтлууртай цахилгаан халаагуур бүхий иж бүрэн нарны халаалтын системийг суурилуулж өгөх юм. Энэ нь өрхийн цахилгааны төлбөрийг бууруулж, эрүүл, тав тухтай орчинд амьдрах боломжийг бүрдүүлж өгөх давуу талтай. Тус аяныг Монгол Улсын Засгийн газар, Бүгд Найрамдах Франц Улсын Засгийн газар, НҮБ-ын Хөгжлийн хөтөлбөр хамтран хэрэгжүүлж буй төслийн хүрээнд зохион байгуулж буй бөгөөд одоогийн байдлаар нийтдээ 69 өрх хамрагдаад байна.