საქართველოს პარლამენტმა შეისწავლა ისტორიული საფორტიფიკაციო ნაგებობების - ციხე-სიმაგრეების, კოშკებისა და გალავნების რევიტალიზაციის პერსპექტივები, რაც დაცვასთან და აღდგენასთან ერთად, ამ ულამაზესი ისტორიული ძეგლებისთვის ახალი ფუნქციებისა და დანიშნულების შეძენას გულისხმობს. რევიტალიზაციის შედეგად, ისტორიული ძეგლი ეკონომიკური და სოციალური მიზიდულობის ცენტრად იქცევა, რაც დადებითად აისახება მიმდებარე რეგიონის განვითარებაზე.

ოთხთვიანი თემატური საკომიტეტო მოკვლევის ფარგლებში, პარლამენტმა შეისწავლა, თუ როგორ უნდა წარიმართოს რევიტალიზაციის პროცესი, რა სახის პოლიტიკა უნდა გატარდეს ისტორიული ძეგლების დაცვისთვის, რა გამოცდილება აქვს ამ მხრივ მსოფლიოს სხვადასხვა ქვეყანას, და რა როლი ეკისრება ადგილობრივ და ცენტრალურ ხელისუფლებას, კერძო სექტორსა და სამოქალაქო საზოგადოებას.

თემატური საკომიტეტო მოკვლევა „საქართველოს ციხე-სიმაგრეები ახალი შინაარსის მოლოდინში“ პარლამენტის კულტურის კომიტეტის ინიციატივით და ევროკავშირისა (EU) და გაეროს განვითარების პროგრამის (UNDP) ხელშეწყობით ჩატარდა.

მოკვლევის შედეგების წინასწარი წარდგენა 18 ოქტომბერს, საქართველოს პარლამენტში გაიმართა. პარლამენტის წევრები და საქართველოს მთავრობის, სამეცნიერო წრეების, კერძო სექტორის, სამოქალაქო საზოგადოებისა და საერთაშორისო ორგანიზაციების წარმომადგენლები მოკვლევის ძირითად მიგნებებს გაეცნენ და ფოტოგამოფენა დაათვალიერეს.

ღონისძიების მონაწილეებს მიმართეს საქართველოს პარლამენტის თავმჯდომარემ შალვა პაპუაშვილმა, პარლამენტის კულტურის კომიტეტის თავმჯდომარემ ელისო ბოლქვაძემ და UNDP-ის მუდმივი წარმომადგენლის მოადგილემ საქართველოში ანნა ჩერნიშოვამ.

თემატური მოკვლევის მიგნებებზე ისაუბრეს პარლამენტის წევრმა ალეკო ელისაშვილმა და მოწვეულმა ექსპერტმა, ხელოვნებათმცოდნემ თათია ღვინერიამ.

თემატური მოკვლევის სრული ანგარიში ოქტომბრის ბოლოს გამოქვეყნდება.