ევროკავშირი (EU) და გაეროს განვითარების პროგრამა (UNDP), თბილისის მუზეუმების გაერთიანება - ილია ჭავჭავაძის ლიტერატურულ-მემორიალურ მუზეუმთან თანამშრომლობით, აგრძელებენ საჯარო დისკუსიათა ციკლს ადამიანის უფლებებისა და თავისუფლებების შესახებ. მესამე შეხვედრაზე, რომელიც 27 ივნისს გაიმართა, შედგა საინტერესო და დამაფიქრებელი მსჯელობა ტრადიციული საზოგადოების ღირებულებებსა და ადამიანის უფლებათა დაცვაზე.

ძირითად მომხსენებლად მოწვეული იყო ილიას სახელმწიფო უნივერსიტეტის პროფესორი, გიგა ზედანია, რომელმაც საკუთარი მოსაზრებები გაუზიარა აუდიტორიას და საკმაოდ აქტიური დისკუსია გამოიწვია. 

მსჯელობაში ასევე ჩაერთო პოლ დალტონი, დანიის სამეფოს ადამიანის უფლებათა ინსტიტუტის მთავარი მრჩეველი, რომელმაც საკუთარი ქვეყნის მაგალითზე ისაუბრა ტრადიციულ ღირებულებებზე დაფუძნებული საზოგადოებაზე და ადამიანის უფლებათა დაცვის მნიშვნელობაზე.

შეხვედრას ესწრებოდნენ სამოქალაქო საზოგადოებისა და უნივერსიტეტების წარმომადგენლები. განსაკუთრებული სტუმრების სტატუსით, დისკუსიაზე მიწვეულები იყვნენ ახალქალაქისა და ყვარლის საჯარო სკოლების მოსწავლეები.

ამ რეზონანსული საჯარო დისკუსიების მეშვეობით, ევროკავშირი და გაეროს განვითარების პროგრამა ქმნიან კონსტრუქციული დიალოგის პლატფორმას და ხელს უწყობენ ადამიანის უფლებებისა და თავისუფლებების შესახებ ცნობიერების ამაღლებას. დისკუსიათა ციკლის მიზანია თანამშრომლობის გზების გამონახვა ახალგაზრდებს, სამოქალაქო საზოგადოებასა და გადაწყვეტილების მიმღებ პირებს შორის და ერთიანი ძალისხმევის ხელშეწყობა თანასწორი, სამართლიანი და ინკლუზიური საზოგადოების შექმნისთვის.