მმართველობის, პოლიტიკისა და სერვისების გაუმჯობესება საქართველოს რეგიონებში

ევროკავშირი და გაეროს განვითარების პროგრამა ხელს უწყობენ ურბანულ განახლებას, განათლებასა და ტურიზმს ექვს მუნიციპალიტეტში

3 February 2023

Photo: UNDP Georgia/Anka Gujabidze — ფოტოს ავტორი: UNDP/ანკა გუჯაბიძე

ევროკავშირის (EU), გაეროს განვითარების პროგრამისა (UNDP) და ადგილობრივ თვითმმართველობათა ეროვნული ასოციაციის ხელშეწყობით, საქართველოს ექვს მუნიციპალიტეტში ადგილობრივი პროექტები ხორციელდება. საქმიანობის ძირითადი მიმართულებებია ურბანული გარდაქმნის ხელშეწყობა, საზოგადოებრივი სივრცეების რეაბილიტაცია და მოწყობა, ისტორიული და კულტურული მემკვიდრეობის დაცვა, სკოლამდელი განათლების გაუმჯობესება და ხარისხიანი მუნიციპალური სერვისების განვითარება.

ადგილობრივი ინიციატივები ხორციელდება ევროკავშირის მიერ დაფინანსებული პროგრამის, „ევროკავშირი ინტეგრირებული ტერიტორიული განვითარებისთვის“ (EU4ITD) ფარგლებში, რომელიც ინტეგრირებული ტერიტორიული განვითარების ხელშეწყობას და საქართველოს რეგიონებში ცხოვრების დონის ამაღლებას ემსახურება.

ადგილობრივი პროექტები შეირჩა 30,800 ევროს ღირებულების საგრანტო კონკურსის მეშვეობით, რომელშიც 22 მუნიციპალიტეტი ჩაერთო. შეფასების კომისიამ, რომელშიც გაეროს განვითარების პროგრამის, ადგილობრივ თვითმმართველობათა ეროვნული ასოციაციისა და საქართველოს რეგიონული განვითარებისა და ინფრასტრუქტურის სამინისტროს წარმომადგენლები შედიოდნენ, 52 საპროექტო იდეა განიხილა და ექვსი გამარჯვებული შეარჩია. თითოეულმა გამარჯვებულმა ინიციატივამ 4,500-დან 6,000-მდე ევროს ოდენობის დაფინანსება მიიღო.

„ინტეგრირებული ტერიტორიული განვითარების შედეგად, მცირდება რეგიონებს შორის არსებული სოციალური და ეკონომიკური უთანასწორობა, ხოლო არსებული გამოწვევების გადაწყვეტა ხდება ერთიან პრინციპებზე დაყრდნობით. ევროკავშირი მჭიდროდ თანამშრომლობს ადგილობრივ ხელისუფლებასთან, სამოქალაქო საზოგადოებასა და მოსახლეობასთან, რათა ეს მიდგომა საქართველოშიც დაინერგოს“.

პაველ ჰერჩინსკი, ევროკავშირის ელჩი საქართველოში

„ჩვენს მხარს ვუჭერთ ადგილობრივ პროექტებს, რომელთა დაგეგმვაში ჩართულები არიან როგორც მუნიციპალიტეტები, ისე მოქალაქეები. მნიშვნელოვანია, რომ მუნიციპალურ ინიციატივებში გათვალისწინებული იყოს ადამიანების საჭიროებები და მოლოდინები, რაც ხელს შეუწყობს თანასწორი და ინკლუზიური განვითარებისთვის ხელსაყრელი გარემოს შექმნას“.

ნიკ ბერესფორდი, UNDP-ის მუდმივი წარმომადგენელი საქართველოში

ექვსი ადგილობრივი პროექტი 2023 წლის მაისამდე გაგრძელდება და შემდეგ მიმართულებებს დაფარავს:

წყალტუბოს მუნიციპალიტეტი (იმერეთი): სოფელ ჩუნეში, ნიკო ლორთქიფანიძის სახლ-მუზეუმის ეზოში მულტიფუნქციური საზოგადოებრივი სივრცე შეიქმნება, სადაც სტუმრებს შესაძლებლობა ექნებათ კომფორტულ გარემოში დაისვენონ, ლიტერატურას გაეცნონ და უფასო wifi-ით ისარგებლონ.
ზესტაფონის მუნიციპალიტეტი (იმერეთი): ოთხი საბავშვო ბაღი სასწავლო და სპორტული აქტივობებისთვის განკუთვნილი ავეჯითა და სხვა ინვენტარით აღიჭურვება.
თელავის მუნიციპალიტეტი (კახეთი): 32 ბაგა-ბაღის 96 თანამშრომელი გაივლის სასერტიფიკატო ტრენინგს პირველადი დახმარების აღმოჩენაში. ორი ბაგა-ბაღი მიიღებს დამატებით დახმარებას სამედიცინო კაბინეტების აღჭურვისთვის. ამ დახმარების შედეგად, ყველა მონაწილე ბაგა-ბაღი დააკმაყოფილებს საკანონმდებლო მოთხოვნებს ბავშვის ჯანმრთელობის დაცვისა და პრევენციის ნაწილში.
ლაგოდეხის მუნიციპალიტეტი (კახეთი): ლაგოდეხის ახლად რეაბილიტირებული მუზეუმის ბიბლიოთეკაში გაიხსნება მულტიფუნქციური სივრცე, მედიათეკა, რომელიც განკუთვნილი იქნება საგანმანათლებლო აქტივობებისთვის, ფილმების ჩვენებისა და ახალგაზრდების შეხვედრებისთვის.
ონის მუნიციპალიტეტი (რაჭა-ლეჩხუმი და ქვემო სვანეთი): ონის ერთ-ერთ მოედანზე გაიხსნება ღია საზაფხულო კინოთეატრი, რომელიც ახალგაზრდებისთვის ორგანიზებულ კინოჩვენებებს, ადგილობრივი არასამთავრობო ორგანიზაციების ინიციატივით გამართულ ტრენინგებს, შემეცნებით დისკუსიებსა და საჯარო შეხვედრებს უმასპინძლებს.
ცაგერის მუნიციპალიტეტი (რაჭა-ლეჩხუმი და ქვემო სვანეთი): პროექტი ხელს შეუწყობს სკოლამდელი განათლების მუნიციპალური სისტემის ციფრულ გარდაქმნას და ელექტრონული საქმისწარმოების დანერგვას, რის შედეგად შესაძლებელი გახდება ბაღების აღსაზრდელთა ელექტრონული რეგისტრაცია და ბაღის აღმზრდელების ონლაინ ტრენინგი.

ევროკავშირის დაფინანსებით, გაეროს განვითარების პროგრამა (UNDP) ახორციელებს 2 მილიონი ევროს ღირებულების ოთხწლიან ინიციატივას „ევროკავშირი ინტეგრირებული ტერიტორიული განვითარებისთვის“ (EU4ITD). პროექტი ხორციელდება საქართველოს ოთხ რეგიონში - გურიაში, იმერეთში, კახეთსა და რაჭა-ლეჩხუმ-ქვემო სვანეთში, და მიზნად ისახავს ადგილობრივ დონეზე ეფექტური, ადამიანებზე ორიენტირებული და გამჭირვალე მმართველობის განვითარებასა და დეცენტრალიზაციის, ინკლუზიური და ფაქტებზე დაყრდნობილი პოლიტიკის, მოქალაქეთა ჩართულობისა და ადგილზე სერვისების მიწოდების ხელშეწყობას.

გარდა ამისა, EU4ITD-ის წვლილი შეაქვს საქართველოს ინტეგრირებული რეგიონული განვითარების საპილოტე პროგრამისა (PIRDP) და 2022-2025 წლების ეროვნული დეცენტრალიზაციის სტრატეგიის განხორციელებაში.

საკონტაქტო ინფორმაცია:

სოფო ჭიჭინაძე, UNDP, +995 599 196907, sophie.tchitchinadze@undp.org
თეიკო კანდელაკი, UNDP, +995 599 103525, tinatin.kandelaki@undp.org
თამარ მიქაძე, ევროკავშირის წარმომადგენლობა საქართველოში, +995 32 2364364, tamriko.mikadze@eeas.europa.eu