Locationsევროკავშირის, გაეროს განვითარების პროგრამისა და გაეროს ადმიანის უფლებების უმაღლესი კომისრის ოფისის ხელშეწყობით, ახალგაზრდები ადამიანის უფლებების დაცვას სწავლობენ
ადამიანის უფლებების საზაფხულო სკოლა 2023
26 June 2023
ფოტოს ავტორი: UNDP/ვლადიმირ ვალიშვილი
ოცდახუთი ახალგაზრდა საქართველოს სხვადასხვა რეგიონიდან ჩაერთო ადამიანის უფლებების ხუთდღიანი საზაფხულო სკოლის მუშაობაში, რომელიც 19-23 ივნისს ყვარელში გაიმართა. საზაფხულო სკოლის ორგანიზატორები არიან გაეროს განვითარების პროგრამა (UNDP) და გაეროს ადმიანის უფლებების უმაღლესი კომისრის ოფისი (OHCHR), საქართველოს იუსტიციის სასწავლო ცენტრთან თანამშრომლობითა და ევროკავშირის (EU) ხელშეწყობით.
საზაფხულო სკოლის პროგრამა მოიცავდა როგორც საგანმანათლებლო, ისე გასართობ აქტივობებს, რამაც ერთმანეთის გაცნობისა და ახალი ინფორმაციის მიღების შესაძლებლობა მისცა ახლგაზრდებს. საზაფხულო სკოლის მსვლელობაში გამართულ შეხვედრებსა და სემინარებზე შედგა ღია და გულწრფელი მსჯელობა ადამიანის უფლებათა დაცვასთან დაკავშირებულ საკვანძო საკითხებზე, მათ შორის, უმცირესობათა უფლებების დაცვაზე, სიძულვილის ენასა და დეზინფორმაციასთან ბრძოლის გზებზე, გენდერული ძალადობისა და დისკრიმინაციის აღმოფხვრაზე საჯარო სივრცესა და ოჯახებში, და ახალგაზრდების როლზე სამოქალაქო ინტეგრაციის პროცესში. მონაწილეები ასევე გაეცნენ ადამიანის უფლებათა დაცვის საერთაშორისო და ეროვნულ მექანიზმებს და იმსჯელეს ადამიანის უფლებებზე დაფუძნებული საზოგადოების მშენებლობის პერსპექტივებზე როგორც საქართველოში, ისე მთელს მსოფლიოში.
„განათლება ხელსაწყოებსა და რესურსებს აძლევს ახალგაზრდებს იმისთვის, რომ ეფექტიანად დაიცვან ადამიანის უფლებები. ევროკავშირი მხარს უჭერს ადამიანის უფლებების საზაფხულო სკოლას ჩვენი უფრო ფართო ხელშეწყობის ფარგლებში, რომელიც თანასწორობის, ჩართულობისა და სამართლიანობის პრინციპების დაცვას ემსახურება."პაველ ჰერჩინსკი, ევროკავშირის ელჩი საქართველოში
“გვჯერა, რომ უფლებადამცველების ახალი თაობის გაზრდა მნიშვნელოვანი ნაბიჯია მდგრადი და თანასწორი საზოგადოების მშენებლობის გზაზე. აღტაცებულები ვართ ახალგაზრდების მოტივაციით, სათანადოდ დაიცვან ადამიანის უფლებები და უკეთესობისკენ შეცვალონ თავისი ქვეყანა.”ნიკ ბერესფორდი, UNDP-ის მუდმივი წარმომადგენელი საქართველოში
„გაეროს ადამიანის უფლებათა უმაღლესი კომისრის ოფისი მხარს უჭერს კანონის უზენაესობის გაძლიერებას, დისკრიმინაციის წინააღმდეგ ბრძოლასა და ადამიანის უფლებების დარღვევის აღმოფხვრას საქართველოში. მივმართავ ადამიანის უფლებათა საზაფხულო სკოლის მონაწილეებს - თქვენ ფლობთ ძალას გაააქტიუროთ ცვლილებები და ხელი შეუწყოთ უფრო სამართლიანი საზოგადოების ჩამოყალიბებას. ახალგაზრდების ენერგია ძალზედ საჭიროა იმ პასუხისმგებლობის შესასრულებლად, რომელსაც ჩვენ ყველა ვიზიარებთ და რაც ადამიანის უფლებების განუხრელ დაცვას გულისხმობს.”ვლადიმირ შკოლნიკოვი, ადამიანის უფლებათა დაცვის უფროსი მრჩეველი OHCHR-ის სამხრეთ კავკასიის ოფისში
ადამიანის უფლებების ყოველწლიური საზაფხულო სკოლა გაიმართა ევროკავშირის მიერ დაფინანსებული პროგრამის, „ადამიანის უფლებები ყველასთვის“, ფარგლებში, რომელიც საქართველოში ადამიანის უფლებების დაცვასა და ამ მხრივ არსებული ხარვეზების გამოსწორებას ემსახურება. 2.5 მილიონ ევროზე მეტი ღირებულების პროგრამას გაეროს ორი სააგენტო ახორციელებს - გაეროს განვითარების პროგრამა (UNDP) და გაეროს ადამიანის უფლებების უმაღლესი კომისრის ოფისი (OHCHR).
საკონტაქტო ინფორმაცია:
- სოფო ჭიჭინაძე, UNDP, +995 599 196907, sophie.tchitchinadze@undp.org
- თეიკო კანდელაკი, UNDP, +995 599 103525, tinatin.kandelaki@undp.org
- თამარ მიქაძე, ევროკავშირის წარმომადგენლობა საქართველოში, +995 32 2364364, tamriko.mikadze@eeas.europa.eu
სხვა სიახლეები
