დედამიწის დღესთან დაკავშირებით, გაეროს განვითარების პროგრამამ (UNDP) და გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრმა ზოგადსაგანმანათლებლო დაწესებულებებისთვის გამოცხადებული საგრანტო კონკურსის “ისწავლე უსაფრთხო გარემოში“ გამარჯვებულები გამოავლინეს.

კონკურსის მიზანია სკოლების შენობების ბუნებრივი კატასტროფებისგან დაცვა და მოსწავლეებისა და ადგილობრივი მოსახლეობის განათლება კლიმატის ცვლილების შესახებ.

კონკურსში ჩაერთო საქართველოს ათი მუნიციპალიტეტის (აბაშა, ახმეტა, გორი, თელავი, ლაგოდეხი, სამტრედია, სენაკი, სიღნაღი,  ქობულეთი და ხობი)  ორმოცზე მეტი საჯარო სკოლა.

ხუთმა საუკეთესო სასკოლო პროექტმა მცირე, მაგრამ არსებითი დაფინანსება მიიღო:

1. ლაგოდეხის მუნიციპალიტეტის სოფელ ჰერეთისკარის საჯარო სკოლა მოაწყობს ამინდის ლაბორატორიას, რომელიც სკოლის მოსწავლეთა პრაქტიკულ სწავლებას უზრუნველყოფს, ხოლო ადგილობრივ მოსახლეობას ამინდის პროგნოზს მიაწვდის.
2. ქობულეთის მუნიციპალიტეტის სოფელ ხალას სკოლა გაამაგრებს მდინარე ჩაქვისწყლის ნაპირს და გააშენებს ქარსაცავ ზოლს, რომელიც სკოლის შენობას მეწყერისა და წყალდიდობისგან დაიცავს.
3. თელავის მე-7 საჯარო სკოლა დაამონტაჟებს ქარსაცავ სარტყელს სკოლის სახურავზე და ჩაატარებს ფოტოებისა და ბლოგების კონკურსს მოსწავლეთათვის.
4. ახმეტის მუნიციპალიტეტის აწყურის საჯარო სკოლა მოაწყობს სანიაღვრე არხებს სკოლასთან მისასვლელ გზაზე, დაასუფთავებს მდინარე ბერხევას კალაპოტს და ჩაატარებს საინფორმაციო კვირეულს ადგილობრივი მოსახლეობისთვის.
5. გორის მე-12 საჯარო სკოლა გაამწვანებს სკოლის ტერიტორიას და მოაწყობს მოსწავლეთა კონფერენციას კლიმატის ცვლილების შესახებ.  

„გარემოსდაცვითი განათლება იწყება სკოლაში, სადაც ახალგაზრდები კლიმატის ცვლილების მიზეზებსა და შედეგებს სწავლობენ და გარემოსადმი მეგობრული ცხოვრების სტილის უპირატესობებს ეცნობიან. საქართველოს მთავრობა დიდ მნიშვნელობას ანიჭებს გარემოსდაცვით განათლებას, რომელიც კლიმატის ცვლილებასთან ადაპტაციისა და მისი ნეგატიური გავლენის შემცირების ეროვნული ძალისხმევის ნაწილია“, - განაცხადა გარემოს დაცვისა და სოფლის მეურნეობის მინისტრის მოადგილემ ნინო თანდილაშვილმა.

„საქართველომ კლიმატის ცვლილების შედეგები უკვე არაერთხელ იწვნია, თუმცა ადამიანები ხშირად ვერ აცნობიერებენ, რომ კლიმატის ცვლილებით გამოწვეული კატასტროფებისგან დაცვაში ყველამ თავისი წვლილი უნდა შეიტანოს და ამ პასუხისმგებლობას სხვას აკისრებენ. ჩვენი მხარდაჭერის შედეგად, ადგილობრივი მოსახლეობა, განსაკუთრებით ახალგაზრდობა, ჩაერთვება კლიმატის ცვლილებისადმი მედეგი საზოგადოების მშენებლობაში“, - აღნიშნა UNDP-ის მოქმედმა ხელმძღვანელმა ანნა ჩერნიშოვამ.

კვლევებით ირკვევა, რომ საქართველოს მოსახლეობა საკმაოდ კარგად აცნობიერებს კლიმატის ცვლილების საფრთხეს. UNDP-სა და ევროკავშირის ხელშეწყობით ჩატარებული უახლესი გამოკითხვის თანახმად, კლიმატის ცვლილება კაცობრიობის წინაშე არსებული საფრთხეების სამეულში სახელდება, სიღარიბისა და ინფექციური დაავადებების შემდეგ. გამოკითხულთა თითქმის 94 პროცენტი მიიჩნევს, რომ კლიმატის ცვლილება გავლენას ახდენს არა მხოლოდ შორეულ ქვეყნებზე, არამედ საქართველოზეც. ამის მიუხედავად, იმავე კვლევამ აჩვენა, რომ საზოგადოების მხოლოდ მცირე ნაწილი მზადაა შეცვალოს ყოველდღიური ქცევა და კლიმატისადმი მეგობრულ ცხოვრების სტილზე გადავიდეს.

გაეროს განვითარების პროგრამა (UNDP) აქტიურად ეხმარება საქართველოს კლიმატის ცვლილებისადმი ადაპტაციაში, შესაბამისი პოლიტიკის მიღებასა და გატარებაში და მოსახლეობის დაცვაში კლიმატის ცვლილებით გამოწვეული კატასტროფებისგან.

სხვა ინიციატივებთან ერთად, UNDP-ის ხელშეწყობა ეყრდნობა 74 მილიონი აშშ დოლარის ღირებულების პროგრამას, რომელიც ხორციელდება UNDP-სა და გარემოს დაცვისა და სოფლის მეურნეობის სამინისტროს მიერ კლიმატის მწვანე ფონდის (GCF), საქართველოს მთავრობისა და შვეიცარიის და შვედეთის მთავრობების ფინანსური მხარდაჭერით. შვიდწლიანი ინიციატივის მიზანია წყალდიდობებისა და სხვა კატასტროფების რისკის შემცირება 11 მდინარის აუზებში, 1.7 მილიონი ადამიანის დაცვა კლიმატის ცვლილებით გამოწვეული კატასტროფებისგან და კლიმატის ცვლილებისადმი მედეგი მომავლის მშენებლობა.

საკონტაქტო ინფორმაცია

• სოფო ჭიჭინაძე, UNDP, +995 599 196907, sophie.tchitchinadze@undp.org
• ირა სულავა, UNDP, +995 599 579105, irine.sulava@undp.org
• ნანა ჩინჩილაკაშვილი, MEPA, +995 599 502619, nana.chinchilakashvili@mepa.gov.ge