LocationsMarkaziy Osiyo Yaponiya va BMT Taraqqiyot Dasturi bilan zo‘ravonlikka asoslangan ekstremizmning oldini olishda hamkorlik qiladi: Olmaotada "Markaziy Osiyoda yoshlar barqarorlik yo‘lida" forumi boshlandi
28-October, 2024
Olmaota, 2024-yil 28-oktyabr — Bugun Olmaotada Markaziy Osiyoda zo‘ravonlikka asoslangan ekstremizmning oldini olish strategiyalariga bag‘ishlangan "Markaziy Osiyoda yoshlar barqaror kelajak uchun" forumi boshlandi. Tadbirda Markaziy Osiyoning beshta davlatidan ishtirokchilar, shu jumladan davlat idoralari vakillari, diniy yetakchilar, ijodkorlar va yoshlar qatnashmoqda. Forum BMT Taraqqiyot Dasturining (BMTTD) mintaqaviy tashabbusi doirasida va Yaponiya hukumatining moliyaviy ko‘magida tashkil etildi. Forumning maqsadi Markaziy Osiyoda zo‘ravonlikka asoslangan ekstremizmga qarshi kurashning samarali usuli sifatida barqaror jamoalarni shakllantirishga ko‘maklashishdir.
“2022-yilda BMTTD zo‘ravonlikka asoslangan ekstremizmga qarshi mintaqaviy sa’y-harakatlarni kuchaytirish maqsadida Markaziy Osiyoda barqaror jamoalarni rivojlantirish va ekstremizmning oldini olishga yo‘naltirilgan mintaqaviy tashabbusning ikkinchi bosqichini ishga tushirdi. Ekstremizmning asosiy sabablarini bartaraf etish va xavf ostidagi yosh avlodga alohida e’tibor qaratish orqali tashabbus har bir yosh inson o‘zini qadrlangan his qiladigan va o‘z jamiyatining barqaror rivojlanishiga hissa qo‘shishga imkoniyati bo‘lgan inklyuziv jamiyatni qurishga yo‘naltirilgan,”— dedi BMTTDning Qozog‘istondagi doimiy vakilasi Katarjina Vavernia.
Zo‘ravonlikka asoslangan ekstremizmning o‘sishi Markaziy Osiyo uchun jiddiy xavf tug‘dirishda davom etmoqda va uzoq yillar davomida erishilgan rivojlanishga tahdid solmoqda. Kambag‘allik, tengsizlik, davlat xizmatlariga kirish imkoniyatining cheklanganligi va shaxsiy rivojlanish uchun imkoniyatlarning kamligi yoshlarni radikallashuvga moyil qiluvchi omillar sifatida ta’kidlanmoqda.
“Yaponiya hukumati Markaziy Osiyoda zo‘ravonlikka asoslangan ekstremizmning oldini olish bo‘yicha sa’y-harakatlarni "Markaziy Osiyo va Yaponiya" muloqoti doirasidagi muhim hamkorlik shakli deb biladi. Biz uchun 2018-yilda qo‘llab-quvvatlagan "Markaziy Osiyoda ekstremizmning oldini olish uchun barqaror jamiyat va mintaqaviy hamkorlikni rivojlantirish" loyihasi o‘z natijalariga erishgani katta sharafdir. Mazkur loyihaning ikkinchi bosqichi ham muvaffaqiyatli davom etayotganidan xursandman va ushbu loyiha mintaqadagi tegishli tashkilotlarning faol hamkorligi bilan maksimal natijalarga erishishiga umid qilaman",- dedi Yaponiya elchixonasining Qozog‘istondagi missiya rahbari o‘rinbosari va maslahatchisi Kanata Tomohiro.
"Markaziy Osiyoda yoshlar barqarorlik yo‘lida" forumi yoshlar imkoniyatlarini kengaytirish orqali muammolarni hal etish platformasiga aylandi hamda yangi ko‘nikmalarni rivojlantirish tashabbuslarini ta’kidlab o‘tdi. Mintaqadagi sharoitlar xilma-xil bo‘lsa-da, Markaziy Osiyoning barcha davlatlari ijtimoiy-iqtisodiy beqarorlik va radikal g‘oyalar tarqalishi kabi umumiy to‘siqlarga duch kelmoqda.
Forumning asosiy sessiyasi Markaziy Osiyoning turli davlat idoralari vakillarini birlashtirgan va yoshlar bandligini zo‘ravonlikka asoslangan ekstremizmning oldini olish uchun muhim strategiya sifatida muhokama qildi. Forumdagi muhokamalarda, shuningdek, diniy yetakchilar va jamoalarning yoshlarni radikallashuvdan asrashdagi o‘rni ko‘rib chiqildi. Ishtirokchilar NNT va xususiy sektorning yoshlar tadbirkorligi va bandligini rivojlantirishdagi hissasini ham muhokama qildilar.
BMTTD butun dunyoda zo‘ravonlikka asoslangan ekstremizmning oldini olishda yetakchi rol o‘ynashda davom etmoqda, BMT Bosh kotibining zo‘ravonlikka asoslangan ekstremizmning oldini olish bo‘yicha Harakatlar rejasi va 16-Barqaror rivojlanish maqsadlariga muvofiq siyosat va dasturlarni ishlab chiqmoqda va amalga oshirmoqda. BMTTDning "Kamsitishga qarshi rivojlanish va turli xil qarashlarga bag‘rikenglikni targ‘ib qilish orqali zo‘ravonlikka asoslangan ekstremizmning oldini olish" strategik dasturi doirasida barqaror va tinch jamiyatlarni yaratishda davlatlarga yordam berishda davom etmoqda.
