ოცდაათზე მეტი ცამეტიდან თექვსმეტ წლამდე ახალგაზრდა ერთ კვირას ბაკურიანში გაატარებს და მწვანე ბანაკის საგანმანათლებლო საქმიანობაში ჩაერთვება.

ახალგაზრდა მოხალისეები და ეკო-ლიდერები საქართველოს 12 მუნიციპალიტეტს წარმოადგენენ - ახმეტას, გარდაბანს, გორს, გურჯაანს, ზუგდიდს, თბილისს, თელავს, ლაგოდეხს, სენაკს, სიღნაღს, ქობულეთსა და ხობს. მწვანე ბანაკში ისინი ინტერაქტიულ საგანმანათლებლო აქტივობებში, დისკუსიებში, როლურ თამაშებსა და ლაშქრობებში  ჩაერთვებიან.

ბანაკის ორგანიზატორები არიან გაეროს განვითარების პროგრამა (UNDP) და საქართველოს გარემოს დაცვისა და სოფლის მეურნეობის სამინისტროს გარემოსდაცვითი ინფორმაციისა და განათლების ცენტრი. საგანმანათლებლო აქტივობებს უძღვებიან მოწვეული ექსპერტები, ხოლო გარემოს ეროვნული სააგენტომ მოამზადა საველე გასვლა მეტეოროლოგიურ საგუშაგოზე.

მწვანე ბანაკი ტარდება UNDP-ის ფართომასშტაბიანი პროგრამის ფარგლებში, რომელიც საქართველოს მოსახლეობის კლიმატის ცვლილებით გამოწვეული კატასტროფებისგან დაცვას ემსახურება და კლიმატის მწვანე ფონდისა და საქართველოს, შვედეთისა და შვეიცარიის მთავრობების მხარდაჭერით ხორციელდება.

გარემოსდაცვითი განათლება და ახალგაზრდების ჩართულობა ამ მრავალმხრივი პროგრამის ერთ-ერთი შემადგენელია, რომელიც ხელს უწყობს კლიმატის ცვლილების შესახებ ინფორმაციის გავრცელებას, საზოგადოებრივი ცნობიერების ამაღლებას და ადგილობრივი ინიციატივების განხორციელებას.

მწვანე ბანაკის ბევრი მონაწილე ადრეც იყო ჩართული ამ პროგრამის აქტივობებში, მათ შორის, სასკოლო კონკურსებში, ახალგაზრდულ კამპანიებში და მოხალისეობრივ საქმიანობაში.

ბანაკის გახსნაზე, რომელიც 20 ივნისს გაიმართა, კლიმატის ელჩებს შეხვდნენ გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი, UNDP-ის მუდმივი წარმომადგენელი საქართველოში ნიკ ბერესფორდი და გარემოსდაცვითი ინფორმაციისა და განათლების ცენტრის დირექტორი თამარ ალადაშვილი.

მათ ახალგაზრდა თაობის ჩართულობის მნიშვნელობაზე ისაუბრეს და ბანაკის მონაწილეებს მოუწოდეს, რომ მომავალშიც გააგრძელონ განათლება და აქტივიზმი მდგრადი და კლიმატგონივრული საზოგადოების ასაშენებლად.