ეროვნულ და საერთაშორისო პარტნიორებთან მჭიდრო თანამშრომლობით, გაეროს განვითარების პროგრამა (UNDP) ეხმარება საქართველოს, შეიმუშავოს სოფლის განვითარების პირველი ეროვნული სტრატეგია და სამოქმედო გეგმა, გაიზიაროს ევროკავშირის საუკეთესო გამოცდილება და გააძლიეროს სოფლის განვითარების პროცესში ჩართული უწყებები - სამინისტროები, ეროვნული სააგენტოები, ასოციაციები და სასწავლო ცენტრები.

სოფლის ეფექტური განვითარება კომპლექსური სფეროა, რომელიც მოითხოვს სოციალური, ეკონომიკური და გარემოსდაცვითი ასპექტების გათვალისწინებას. ამ ერთიან პროცესში მნიშვნელოვან როლს ასრულებს ისეთი დარგების  განვითარება და წარმატება, როგორიცაა განათლება, მეწარმეობა, ინფრასტრუქტურა, ბიო მრავალფეროვნების დაცვა, კლიმატის ცვლილებისადმი ადაპტაცია.

საქართველოში პირველი სოფლის განვითარების სტრატეგია შემუშავდა აჭარის ავტონომიურ რესპუბლიკაში 2015 წელს. ევროკავშირი და გაეროს განვითარების პროგრამა (UNDP) აქტიურად მონაწილეობდნენ ამ პროცესში და ხელს უწყობდნენ აჭარის მთავრობას. აჭარის სოფლის განვითარების სტრატეგია შეიძლება ჩაითვალოს საცდელ მოდელად ეროვნული პოლიტიკის შემოღებისათვის. ჩვენ ვაგრძელებთ თანამშრომლობას აჭარის ავტონომიური რესპუბლიკის მთავრობასთან და ვეხმარებით შესაბამისი სამოქმედო გეგმის შემუშავებაში.